我在樓市十年(一)
以往十年可算是筆者投資里程豐盛的階段，那就由十年前的2007年開始講起！記得當時筆者已手持相當數量的物業，有單幢樓、唐樓、樓上舖、街舖仔、凶宅都有，但都是以細價舊樓為主。香港大部分人當搵到錢都會｢身痕」，走去買靚錶買跑車，筆者亦不例外，但我只喜歡買一樣嘢，就係樓 !
2008，作者選了豪宅區九龍塘一個千多呎的單位，建築面積只是$5,300呎
以前冇錢嗰時就去買舊樓，貪佢平、首期少、回報高。但現在有些錢，自然會有啲｢貪慕虛榮」想買些半山豪宅。因我在灣仔、銅鑼灣區發跡，所以都會鍾情於此區的半山樓，最終選訂目標—大坑。
還記得當天約了個Agent睇樓，我就坐的士上大坑，由維園上橋轉入大坑道，一路由山腳上山，經過豪園、光明臺、帝后臺、遠望還看到名門，頓時令在出世時住板間房、在旺角街市長大、完全未曾到過大坑這高尚住宅區的我，不期然有種想做｢上等人」嘅感覺，忽然間覺得自己人都高檔咗，連講說話都好似斯文咗，那種自我膨脹的感覺完全從心底裏湧現出來。
同Agent睇完樓即時中哂毒，立即加按套現幾層舊樓，又賣咗層樓上舖，最終籌夠子彈在該區購入了三個單位，還趕得切當年最尾三個月大升20%的升浪。但今天回望，都是虛榮感累事，大坑樓以至全港各區半山豪宅都沒有一個畀細價樓在這幾年升得多。半山豪宅不是不升，但只是跟大市同步，升幅絕對比不上細價樓。作為一個資深物業投資者，入貨一定要跑贏大市，如同大市同步即當輸！
直至2008年初，樓市升咗一浸，覺得港島區樓價貴買唔落手，於是筆者轉戰九龍區，因時間尚短還未吸取上次買樓的教訓，第一站又選了半山豪宅區九龍塘。當時睇中一個千多呎的單位，以建築面積計都只是$5,300呎，又是41名校網，就算小朋友他日考不到直資名校，到時大抽獎都可能｢搏到大霧」入喇沙、瑪利諾這些神級學校。
然而始終礙於銀碼大，心大心細一路未能決定，直至眼見當年日出康城「首都」開盤，平均每呎約$5,200，馬拉松式通宵賣樓22小時，一晚沽清全部約2,200個單位。筆者心想:「吓? 康城咁遠都賣成$5,200/呎，而且未來仲有大量供應。」雖然九龍塘那層不是全新樓，但樓齡還不足十年，豪宅區又是名校網，呎價又差不多，最終唔駛諗於首都開售第二天扑鎚。直至今天，此單位升幅雖不及細價樓，但完全跑贏「首都」成條街。
因銀碼大，購入這個單位已耗用筆者大量資金，需休養生息一段時間，才能再次出擊，誰知美國雷曼債券爆煲，金融海嘯殺到埋嚟，筆者手頭現金相當緊拙，難以抵禦這突如其來的風暴，最後筆者怎樣能捱過這一役呢？請留意此專欄！