Firelookingfor
火燎森
Firelookingfor

日本物業篇(十三)申請買樓轉名問題

日本嘅樓市,同佢哋民族性都有啲關係,就係好講誠信。因為每一個人都好重視自己嘅誠信,所以一有啲奇奇怪怪嘅嘢,就會令到佢哋諗到最負面人性最醜惡嗰個地步,呢啲真係唔可以怪得佢地。

對於香港人嚟講,我哋做嘢比較實際,最大嘅誠信就係收到錢。喺呢一方面我係贊同嘅,不過入鄉隨俗,有啲嘢我哋都要順住佢哋嘅諗法去做,咁先至無往而不利。

呢排唔少讀者問咗好多問題,我將佢歸納咗幾大類。今日想抽出嚟同大家傾其中一個比較多人覺得奇怪嘅問題。讀者A同我呻,佢話申請咗個單位,諗諗下都係用自己細妹個名去申請好似好啲。結果個日本業主即刻唔同呢一位買家簽任何合同。佢覺得好奇怪點解要咁做,總之最後畀到錢買多個單位亦冇影響交易時間咁就得啦。

不過日本人就未必咁諗,佢會覺得你冇諗清楚用邊個名做業主,日本人通常做一件事前要諗二百幾次先行動,佢哋只係會懷疑經紀係咪亂咁搵一個人申請,霸咗個盤,跟住先至狂sell,sell到就yeah,sell唔到亦都冇損失,咁樣對個社會好唔公平,甚至會令世界失平衡,繼而誘發大家嘅不信任 ,直頭好似喺社會上面揼咗個化學武器咁大罪。

所以喺日本唔係畀到錢就大曬!都要諗多啲人哋嘅諗法。總之日本係一個守規矩嘅國家,你話佢死板又好,你話佢有原則都好。記住入鄉隨俗,個盤一日未到手,啲名盡量唔好轉嚟轉去,否則甩咗個好盤,隨時影響一生。

此欄文章的觀點均來自作者,不代表本網立場。