邊個話起樓一定貴外國新建築方法平到笑

2017年03月16日 16:58

香港地產商話建築費近年要4、5000蚊一呎，麵粉價高新樓無得平賣。但起樓方法邊個話要千篇一律，外國就有唔少另類起屋方法，唔單止成本平好多，仲可以大大縮短建築時間，唔到你唔服。

3D打印起屋

3D打印唔只可以印食物、印模型，今時今日屋都印到出嚟，唔係玩具屋，係真係住得個啲。

網上圖片

美國一間3D打印公司，用咗1日時間，就喺俄羅斯首都莫斯科以南100公里一個小鎮，用自行研發嘅大型3D打印機，print咗間400呎石屎屋出嚟，print完再安裝保溫層、窗同天花，放埋家俬電器，間隔絕對實用過香港啲奇形怪狀新盤，成本只係需要8萬蚊港幣，係8萬蚊！換著同一價錢，係香港只可以起到20至16呎既屋。打印公司就話，3D打印屋啱晒樓價高嘅城市，起得快又夠晒平，壽命更長達175年。

網上圖片

網上圖片

貨櫃屋

貨櫃屋香港都有，但都係新界個啲貨櫃場非常租俾人，入面環境惡劣又悶熱，送都唔多想住。但外國嘅貨櫃屋完全係另一回事，佢哋嘅貨櫃屋絕對係藝術嘅結晶品，入面裝修後肯定舒服過香港唔少過千萬嘅豪宅。

網上圖片

一個貨櫃箱空間狹小，最多做劏房，但係將貨櫃lego咁疊起，再加傳統建材，就可以做出好多變化。外國已經有好多貨櫃屋嘅例子，別墅、豪宅、辦公室，甚至住宅大廈、藝術中心都起到。每個貨櫃可載受5萬磅重量，最高可以起到8層樓，而根據澳洲貨櫃屋網站顯示，最平嘅一房一廳貨櫃屋，只需要66萬港幣，三房單位就200萬到，但記住呢個係貨櫃改造公司包埋運貨、安裝嘅價錢，包埋廚房同廁所用具，公司承諾10日裝好一間2房1廳單位。如果需要30個貨櫃以上的大型豪華屋，就要大約6個禮拜。